१७ माघ/ अर्थ र व्यापार – प्रधानमन्त्री केपी शर्मा ओलीले भारत र चीनलगायत अन्तर्राष्ट्रिय बजारमा निर्यात बढाउने अवस्था सृजना गर्न उद्योगी–व्यवसायीलाई आग्रह गरेका छन् । यसका लागि अनुकुल वातावरण बनाउन सरकारले पहल गरिरहेको भन्दै उनले स्वदेशी बस्तुहरुको उत्पादन बढाउन व्यवसायीलाई सुझाव दिए ।
नेपाल चेम्बर अफ कमर्शको आयोजनामा बिहीबारबाट काठमाडौको भृकुटीमण्डपमा सुरु भएको आठौँ अन्तर्राष्ट्रिय चेम्बर एक्स्पोको उद्घाटन समारोहमा प्रधानमन्त्री ओलीले निर्यात बढाउन यस्तो आग्रह गरेका हुन् ।
उनले निर्यात बढाउन ठूलो परिमाणमा उत्पादन वृद्धि गर्न तथा उत्पादित वस्तु कहाँ बिक्री हुन्छ भन्ने थाहा पाएर त्यसअनुसारको तयारी गर्न आग्रह गरे । सन् २०२६ मा नेपाललाई मध्यमस्तरको आय भएको मुलुकमा स्तरोन्नति गर्ने लक्ष्य पूरा गर्न सरकार प्रतिबद्ध रहेको भन्दै उनले पूर्वाधार विकासको क्रम जारी रहेकाले नेपाल अझ तीव्रताका साथ अगाडि बढ्ने बताए ।
‘अहिले हामीले व्यापारको जुन आँकडा तयार गरिरहेका छौं । त्यो वास्तविक छैन । खपतका लागि किनेको वा आयात गरेको कार्यलाई मात्रै व्यपार मान्न सकिंदैन’, प्रधानमन्त्री ओलीले भने, ‘हामी विज्ञान र प्रविधिको प्रयोग गरेर विभिन्न सामाजिक क्रियाकलाप र उत्पादन बढाउन लाग्नुपर्नेछ । उनले अहिलेको सरकार अर्थतन्त्रको विकासका लागि अत्यन्तै गम्भीरताकासाथ लागिरहेको बताए ।
पूर्वाधार विकासको क्रम जारी रहेकाले नेपाल अझ तीव्रताका साथ अगाडि बढ्ने बताउँदै प्रधानमन्त्री ओलीले एकदम असहज राजनीतिक अस्थिरता जस्ता कुराले अर्थतन्त्रलाई प्रतिकूल असर परेका बेला त्यसलाई लयमा फर्काउन नयाँ सरकार बनेकाले सन् २०२६ मा नेपाललाई मध्यमस्तरको आय भएको मुलुकमा स्तरोन्नती गर्ने तयारीमा भएको जनाए ।
पूर्वाधार विकासका क्रममा सरकारले त्रिभुवन अन्तर्राष्ट्रिय विमानस्थललाई बुटिक विमानस्थल बनाउँदै अन्य विमानस्थलहरु विस्तारका साथै नदीको बाटोबाट समुद्रसम्म पहुँच विस्तार गराउने काम भइरहेकाले यी सबै उद्योग–व्यवसायको विकास तथा मुलुकलाई सम्पन्न बनाउनका लागि थालिएको दावी गरे ।
नेपाललाई न्यून आय भएको मुलुकबाट स्तरोन्नति गराउन सबै जुट्नु पर्ने आग्रह गर्दै प्रधानमन्त्री ओलीले आफू सप्रिउँ र देशलाई पनि सपारौं भन्ने लक्ष्यका साथ चेम्बर एस्क्पो भएकामा खुसी व्यक्त गरे ।
सो कार्यक्रममा सञ्चार तथा सूचना प्रविधिमन्त्री पृथ्वी सुब्बा गुरुङले सरकारले कृत्रिम बौद्धिकताबारे नीतिगत स्पष्टता गरी कानुनी प्रबन्ध गर्ने र सूचना प्रविधि क्षेत्रको व्यवसायिक विकासका लागि सरकारले ल्याएका अध्यादेश उपयोगी हुने बताए ।
नेपाल चेम्बर अफ कमर्शका अध्यक्ष कमलेशकुमार अग्रवालले सरकारले हालै ल्याएका विभिन्न अध्यादेशले उद्योग–व्यवसाय क्षेत्रमा सकारात्मक आशा प्रवाह गरेको बताए ।
नेपाल, भारत, पाकिस्तान लगायत मुलुकका गरी एकसय २५ स्टल रहेको चेम्बरको सो मेला आगामी २१ माघसम्म सञ्चालन हुने छ ।