२९ फागुन/अर्थ र व्यापार – अर्थमन्त्री वर्षमान पुनले सेयर बजारमा सुधारका लागि नीतिगत कदम चाल्ने संकेत गरेका छन्। उनले पुँजीबजारको सुधार सम्बन्धमा विभिन्न तीन संस्थासँग सुझाव मागेका छन्।
उनले नेपाल धितोपत्र बोर्ड, नेपाल स्टक एक्सचेन्ज र सिडिएस एण्ड क्लियरिङ लिमिटेडसँग सुझाव मागेका हुन्। मन्त्री पुनको निर्देशन अनुसार ती तीन वटै संस्थालाई अर्थ मन्त्रालयले आइतबार पत्र पठाएको छ ।
पत्रमा सेयर बजारमा तत्काल सुधार सम्बन्धमा ७ दिनभित्र कार्ययोजना पेस गर्न भनिएको छ। ती तीन वटै संस्थालाई मन्त्रालयले सरोकारवालासँगको सुझावका आधारमा कार्ययोजना बनाउन भनेको छ । ‘अर्थतन्त्रको विकासमा महत्वपूर्ण भूमिका खेल्ने पुँजी बजारमा देखिएका समस्या समाधान एवं त्यस क्षेत्रको विकास र विस्तारका लागि तत्काल गर्नुपर्ने कामहरुको सम्बन्धमा सम्बन्धित सरोकारवाला समेतको राय लिइ ७ दिनभित्र कार्ययोजना पेस गर्न मन्त्रीज्यूको निर्देशन अनुसार अनुरोध छ,’ पत्रमा भनिएको छ।
पद्बहालीपछि उनले ६० लाख नागरिकसँग जोडिएको सेयर बजारमा सुधारको कदम चाल्ने बताएका छन । मन्त्री पुनले अब निर्णयमा पुग्नलाई नियामक निकायको सुझाव मागेका हुन्।
उनले अर्थ मन्त्रालय सम्हालेदेखि सेयर बजार उकालो लागिरहेको छ । पदबहालीका क्रममा दिएको अभिव्यक्तिका कारण मन्त्री पुनले सुधारको कदम चाल्ने लगानीकर्ताको विश्वास छ।
लगानीकर्ताले माओवादी नेतृत्वलाई अनुदार मान्दै आएको पृष्ठभूमि र दुई वर्षयता नेप्से १,८००–२,००० विन्दुमा घुमिरहेको पृष्ठभूमिमा अर्थमन्त्री पुनमाथि बजारमा सुधारको कदम चाल्नुपर्ने दबाब छ।
बजारप्रति नरम भनिने नेपाली कांग्रेसका नेता तथा निवर्तमान अर्थमन्त्री डा. प्रकाशशरण महत ११ महिना अर्थ मन्त्रालय सम्हाल्दा सुधारका कदम चाल्न नसकेर लगानीकर्तामाझ आलोचित भएकामा पुनले जस लिन चाहेका छन्।
उनले आइतबार ब्रोकरहरुसँगको भेटमा पनि नेपाल राष्ट्र बैंकसँग समन्वय गरेर नीतिगत रुपमा बजारमा सुधारको कदम चाल्ने प्रतिबद्धता जनाएका छन्।
अर्थमन्त्री पुनले अर्थतन्त्र चलायमान बनाउन मात्र नभएर, सेयर बजार मैत्री नीतिका लागि गभर्नर महाप्रसाद अधिकारीसँग छलफल थालिसकेका छन्। दोस्रो पटक अर्थमन्त्री बनेका पुनलाई बजारले स्वागत गरिसकेको छ। उनी गत बुधबार अर्थमन्त्री नियुक्त भएका थिए। त्यो दिन उतारचढाव देखिएको बजार अर्थमन्त्रीमा पुन आउने निश्चित भएपछि अन्तिम क्षणमा ९.३३ अंकले सेयर बढेको थियो।
नेप्से त्यसको भोलिपल्ट बिहीबार १३.५१ र आइतबार २२.१० अंकले बढेर २०५२. ६५ को विन्दुमा पुगेको थियो । आफू आएपछि नेप्से लगातार बढ्नुलाई मन्त्री पुनले लगानीकर्ताले गरेको भरोसाका रुपमा लिएका छन्।