२१ चैत/अर्थ र व्यापार – आगामी २८ र २९ चैतमा हुने नेपाल उद्योग वाणिज्य महासंघको निर्वाचनमा बरिष्ठ उपाध्यक्षका प्रत्यासी उम्मेदवार अन्जनकुमार श्रेष्ठ सहित उनको समुहका उम्मेदवारहरुले मंगलबार बिहान मनोनयन दर्ता गरेका छन् । बिहान १० बजे महासंघ सचिवालय टेकूमा पुगेर बरिष्ठ उपाध्यक्षका प्रत्यासी उम्मेदवार अन्जन श्रेष्ठ समुहका उम्मेदवारहरुले विभिन्न पदमा मनोनयन दर्ता गराएका हुन् ।
अन्जन श्रेष्ठको समुहबाट व्यवसायी अरुणराज सुमार्गीले जिल्ला नगरतर्फको उपाध्यक्षमा मनोनयन दर्ता गराएका छन् । यसैगरि, मनीषलाल प्रधानले वस्तुगततर्फको उपाध्यक्षमा मनोनयन दर्ता गराएका छन् भने एसोशिएट उपाध्यक्ष तर्फबाट उमेशलाल श्रेष्ठको समुहबाट हिजो उम्मेदवारी घोषणा गरेका भरतराज आचार्यले पनि अन्जन श्रेष्ठको समुहतर्फको समर्थन सहित उम्मेदवारी दर्ता गराएका छन् ।
आचार्यलाई अञ्जन श्रेष्ठको समूहले पनि समर्थन गरेको हो । अब एसोशिएट तर्फको उपाध्यक्षमा उमेशलाल र अञ्जन दुबै समुहका साझा उम्मेदवार आचार्य बनेका छन् । अञ्जनको समुहमा एसोशिएट उपाध्यक्षका उम्मेदवार प्रवलजंग पाण्डेले उम्मेदवारी फिर्ता लिएपछि भरत आचार्य श्रेष्ठ द्दोय दुइवटै समुहको साझा उम्मेदवार भएका हुन् ।
बरिष्ठ उपाध्यक्षका अर्का प्रत्यासी उम्मेदवार रामचन्द्र संघईको समूहबाट एसोशिएट उपाध्यक्षमा उम्मेदवारी दिएकी ज्योत्सना श्रेष्ठसँग अब आचार्यको प्रतिस्पर्धा हुनेछ । अझै आचार्यले ज्योत्सना श्रेष्ठसँग पनि सहमति गर्ने छलफल भइरहेको व्यवसायीहरुले बताएका छन् ।
यसअघि एशोसिएटतर्फ अन्जन समुहमा रहने गरी एक कार्यक्रममा औपचारिक रुपमा सार्वजनिक भएकी ज्योत्सना श्रेष्ठ एकाएक अर्का बरिष्ठ उपाध्यक्षका प्रत्यासी उम्मेदवार रामचन्द्र संघईको समुहमा पुगेकी थिइन् । सोही कारण अन्जन समुहमा एशोसिएटतर्फको उपाध्यक्षमा प्रबलजंग पाण्डे अघि सरेका थिए ।
मंगलबार सबै पदमा उम्मेदवारी दर्ता गराएका श्रेष्ठ समुहका व्यवसायीहरुको औपचारिक घोषणा भने भईसकेको छैन । यस अघि रामचन्द्र संघईले गत आइतबार साँझ लैनचौर बैंकटमा कार्यक्रम राखेर आफ्नो समुहका उम्मेदवार घोषणा गरेका थिए ।
बरिष्ठ उपाध्यक्षका अर्का प्रत्यासी उम्मेदवार उमेशलाल श्रेष्ठले पनि हिजो सोमबार साँझ ललितपुरको हेरिटेज गार्डेनमा एक कार्यक्रमकाबीच औपचारिक रुपमा आफ्नो समुहका उम्मेदवारहरुको नाम घोषणा गरेका थिए ।
बरिष्ठ उपाध्यक्षका प्रत्यासी अन्जन श्रेष्ठले भने मनोनयन दर्तागरेपछि सबै पदमा उम्मेदवारहरु टुङ्गो लगाएर बुधबार औपचारिक रुपमा समुह घोषणा गर्ने तयारी गरेका छन् । महासंघको निर्वाचन कार्यतालिका अनुसार मंगलबार साँझ ५ बजेसम्ममा सबै उम्मेदवारहरुले मनोनयन दर्ता गराईसक्नुपर्ने महासंघ निर्वाचनको तालिका छ ।