६ चैत /अर्थ र व्यापार – नेपाल निर्माण व्यवसायी महासंघले निर्माण सामग्री र पेट्रोलियम पदार्थको मूल्य नियन्त्रण नभए ‘कन्ट्रक्सन होलिडे’ मनाउने चेतावनी दिएको छ ।
पछिल्लो चार/पाँच महिनायता भएको अत्यधिक र अप्रत्याशित मूल्यवृद्धिका कारण निर्माण व्यवसायीलाई काम गर्न समस्या भएको भन्दै महासंघले सरकारलाई दबाब दिन ‘कन्ट्रक्सन होलिडे’ मनाउनुपर्ने अवस्था आएको चेतावनी दिएको हो ।
निर्माण व्यवसायीले जुवा खेल्नका लागि यो व्यवसायमा नलागेको बताउँदै महासंका अध्यक्ष रवि सिंहले भने, ‘चार महिनामै दुई गुणा मूल्यवृद्धि भएपछि कसरी विकास निर्माणको काम अघि बढ्छ ?’
यसरी सरकारको ध्यानाकर्षण गराउँदा पनि अझै व्यवसायीको मागप्रति सरकार गम्भीर नभए कन्ट्रक्सन होलिडे मनाउनेबारे आगामी १४ चैतमा महासंघले छलफल गर्नेसमेत उनले जानकारी दिए ।
आगामी १४ चैतसम्म सरकारलाई आफ्ना समस्या समाधान गर्न आग्रह गर्ने र यदि सम्बोधन नभएको खण्डमा सोही दिन हुने महासंघको राष्ट्रिय भेलाबाट कन्ट्रक्सन होलिडेका लागि चरणबद्ध आन्दोलनका कार्यक्रम घोषणा गर्ने महासंघले जनाएको छ ।
यसैगरी, महासंघले भर्खर संघीय संसद्बाट पारित भएको सार्वजनिक खरिद नियमावली २०६४ को ११औं संशोधनप्रति पनि आपत्ति जनाएको छ । महासंघले शुक्रबार राजधानीमा पत्रकार सम्मेलन गरी आफ्ना माग सम्बोधन नभएको भन्दै यस्तो आपत्ति जनाएको हो । सो खरिद नियावली संशोधन बिहीबार राजपत्रमा प्रकाशित भइसकेको छ ।
लुम्बिनी प्रदेश सरकारले प्रकाशन गरेको बोलपत्रको क्षेत्राधिकारअनुसार नेपालका दुई वटा कम्पनीले मात्रै भाग लिन मिल्ने व्यवस्था रहेकोप्रति महासंघले आपत्ति जनाएको हो ।
यसरी दुईवटा कम्पनीलाई मात्रै दृष्टिगत गरी जनताले तिरेको करको दुरुपयोग हुने र अस्वस्थ प्रतिस्पर्था पनि हुने बताउँदै अध्यक्ष सिंहले भने, ‘अहिले संशोधन पनि तिनै कम्पनीले भाग लिन पाउनेगरी भएको छ । यसमा महासंघ घोर आपत्ति जनाउँदै तत्काल खारेजीको माग गर्छ ।’
महासंघले साना निर्माण व्यवसायीले काम पाउने सुनिश्चितता र महासंघको सुझाव बमोजिम एकपटकमा पाँचवटा निर्माण कार्यको संख्याका आधारमा मात्र पाउने व्यवस्था हुनेगरी ११औं संशोधन गर्नुपर्ने जनाएको छ । यसैगरी, साना व्यवसायीलाई निर्माण कार्यमा संलग्न गराउन २५ करोड रुपैयाँसम्मका आयोजनामा जेभी पार्टनर भएको अवस्थामा कुनै एउटाले मात्रै अनुभवको सर्टिफिकेट देखाएमा पुग्ने व्यवस्था गर्नुपर्ने महासंघले जनाएको छ ।
यस्तो व्यवस्था हुँदा नयाँ तथा साना व्यवसायीलाई सहज हुने अपेक्षा गरिएको महासंघले जनाएको छ । गत २७ देखि २९ फागुनसम्म काठमाडांैमा भएको २३औं साधारणसभा एवं १२औं अधिवेशनपछि सम्पन्न निर्वाचनबाट महासंघको अध्यक्षमा रवि सिंह पुनः दोहोरिएका हुन् । सो निर्वाचनमा अध्यक्षमा विजयी सिंहसँगै महासंघको नयाँ नेतृत्वको ४६ पदमा नवनिर्वाचित व्यवसायी चुनिएका छन् ।