२७ मंसिर/अर्थ र व्यापार – बीमा समितिले आफ्नै नयाँ कार्यालय भवन बनाउन सुरु गरेको छ । सोमबार समितिको कुपण्डोलस्थित जग्गामा बनाउन लागिएको सो भवनको शिलान्यास अर्थमन्त्री जनार्दन शर्माले गरेका हुन । सो कार्यक्रममा शहरी विकासमन्त्री रामकुमारी झाँक्रीको पनि सहभागीता रहेको थियो । 
यसैगरि, नयाँ कार्यालय भवन शिलान्यास कार्यक्रममा नेपाल राष्ट्र बैकका गर्भनर महाप्रसाद अधिकारी, नेपाल धितोपत्र बोर्डका निमित्त कार्यकारी निर्देशक निरज गिरी, नेपाल उद्योग बाणिज्य महासंघका अध्यक्ष शेखर गोल्छा, भवन निर्माण विभागका महानिर्देशक पदमकुमार मैनाली लगायतको उपस्थिति थियो । 
भवन शिलान्या गर्दै अर्थमन्त्री शर्माले बीमा क्षेत्रको आवश्यकतासँग बीमा समिति जोडिनुपर्ने बताए । उनले भने, ‘बीमा समितिले भवन बनाउने नयाँ कामको सुरूवात गरेको छ । यससँगै नियमनकारी संस्थाको रूपमा गर्नुपर्ने कामहरू पनि समितिले गर्दै जानुपर्छ । अहिले नयाँ भवनसँगै बीमा क्षेत्रले नयाँ ऐनको पनि माग गरेको छ । बीमा क्षेत्रको आवश्यकतासँग पनि बीमा समिति जोडिनुपर्छ ।’ 
यसैगरि, अर्थमन्त्री शर्माले सबैभन्दा पहिले जोखिम के हो ? भन्ने कुरा पनि बीमा कम्पनीले जान्नु जरूरी रहेको बताए । उनले बीमा कम्पनीको संख्या अनुसार बीमाको पहुँच न्यून रहेको, गरिबलाई बीमाले नसमेटेको, बीमाको दावी भुक्तानी पाइँन भन्दै केही बीमित अर्थमन्त्रालयसम्म धाउनुपरेको तितो यथार्थका बारेमा समेत सुनाएका थिए । 
उनले कोरोना बीमाको प्रसंग जोड्दै महामारीको बीमा गर्ने नेपाल एक मात्रै देश रहेको र दावी भुक्तानीको समस्या समाधानका लागि गृहकार्य भइरहेको बताए । मन्त्री शर्माले भुक्तानी पाइन भनेर बीमितले अन्यत्र धाउने अवस्थाको पनि अन्त्य हुनुपर्ने बताए ।
यसैगरि, शहरी विकासमन्त्री रामकुमारी झाँक्रीले नियमनकारी निकायको भवन र वातावरण राम्रो हुनुपर्ने भन्दै अब बीमा समितिले गरेको उद्घाटन अरूको लागि उदाहरण बन्ने बताइन । 
राष्ट्र बैंकका गर्भनर महाप्रसाद अधिकारीले बाध्यात्मक हिसाबले बीमा गर्ने प्रवृत्ति कायम रहेको र त्यसमा सुधार हुनुपर्ने बताए । भवन निर्माण विभागका महानिर्देशक मैनालीले करबाहेक ४१ करोड ९२ लाख रूपियाँमा भवनको सम्झौता भएको र सकेसम्म छिटो भवन निर्माण सम्पन्न गर्ने प्रतिवद्धता व्यक्त गरे । बीमा समितिका अध्यक्ष सिलवालले सरकारले निर्देशन दिएअनुसार बीमाको ३३ प्रतिशत पहुँच पुर्याउन आफूहरूले काम गरिरहेको बताए । 
बीमा समितिका कार्यकारी निर्देशक राजुरमण पौडेलले भवन निर्माण अवधि २४ महिना रहेको भन्दै यस भवन निमार्णले आफूहरूमा थप नयाँ उत्साह थपेको बताए ।