१८ पुस / अर्थ र व्यापार - एनआईसी एशिया लघुवित्त वित्तीय संस्थाले ४७ करोड ५५ लाख रूपैयाँको प्राथमिक सेयर निष्कासन गर्ने भएको छ। यो प्राथमिक सेयर लघुवित्त वित्तीय संस्थाहरू मध्ये अहिलेसम्मकै सबैभन्दा धेरै हुनेछ।

 संस्थाले प्राथमिक सेयर निष्कासन गर्न गरेको रेटिङमा मध्यम किसिमको सुरक्षाको संकेत जनाउने ‘केयर एनपी आइपीओ ग्रेड चार प्लस’ प्राप्त गरेको छ। सर्वसाधारणका लागि ४७ लाख ५५ हजार कित्ता प्राथमिक सेयर निष्कासन गर्ने तयारी गरेको संस्थाले नेपाल धितोपत्र बोर्डबाट अनुमति लिनु पर्नेछ।

नेपाल राष्ट्र बैंकबाट संस्थाले २०७४ मंसिरमा सञ्चालन अनुमति प्राप्त गरेको थियो। संस्थाको मुख्य कार्यालय जाजरकोटमा छ। न्यून आयस्रोत भएका परिवारलाई वित्तीय सेवा प्रदान गर्दै आएको संस्थाले स्थानीय स्तरको विकासमा टेवा र्पुयाउँदै आएको छ।

प्रमुख कार्यकारीमा लक्ष्मीप्रसाद शर्मा र सञ्चालक समितिको अध्यक्षमा कपिल ढकाल छन्। शर्मालाई एनआईसी एशिया बैंकले पठाएको हो। बैंकिङ क्षेत्रमा १६ वर्ष भन्दा लामो अनुभव भएका शर्माले लघुवित्त क्षेत्रमा मात्रै नौ वर्ष काम गरेका छन्।

लघुवित्त दुई वर्षको अवधिमै १८ वटा जिल्लामा ५८ वटा शाखा सञ्जाल विस्तार गर्न सफल भएको छ। चालु आर्थिक वर्ष थप ५० वटा शाखा कार्यालय विस्तार गर्ने योजना छ। निक्षेप संकलन, कर्जा लगानी, रेमिट्यान्स र बीमाको सुविधा प्रदान गर्दै आएको छ।

हालको चुक्ता पुँजी एक अर्ब रूपैयाँ रहेको संस्थाको जगेडा कोषमा १६ करोड २९ लाख रूपैयाँ छ। प्राथमिक सेयर निष्कासनपछि चुक्ता पुँजी एक अर्ब ४७ करोड रूपैयाँ पुग्नेछ। प्राथमिक सेयर निष्कासनपछि एनआईसी एशिया पुँजीको हिसाबले तेस्रो स्थानमा हुनेछ। पहिलोमा निर्धन उत्थान र छिमेक लघुवित्तको एक अर्ब ५० करोड रूपैयाँ पुँजी छ।

चालु आर्थिक वर्षको तीन महिनाको अवधिमा संस्थाले तीन अर्ब नौ करोड रूपैयाँ ऋण लिएको छ। त्यस्तै ६३ करोड १२ लाख रूपैयाँ निक्षेप संकलन गरेको छ। यसै अवधिमा चार अर्ब ४० करोड रूपैयाँको कर्जा लगानी गरेको छ।

एनआईसी एशिया बैंकको लगानी रहेको लघुवित्त संस्थाले बैंककै शैलीमा शाखा विस्तार र कर्जा लगानीमा जोड दिएको हो। चालु आर्थिक वर्षको पहिलो त्रैमासिकको अवधिमा संस्थाले ५ करोड ५३ लाख रूपैयाँ नाफा आर्जन गरेको छ।