३१ बैशाख /अर्थ र व्यापार- मिर्मिरे, नागबेली र किसान लघुवित्तीय संस्था मर्जर हुने भएका छन् । गाभ्ने गाभिने प्रक्रिया अगाडि बढाउन तीनवटै संस्थाले सहमतिपत्रमा हस्ताक्षर गरेका छन् । सहमतिपत्रमा टेक बहादुर बोहरा मिर्मिरे लघुवित्त वित्तीय संस्था, दीपबहादुर श्रेष्ठ नागबेली लघुवित्त वित्तीय संस्था र नेत्रप्रसाद जोशी किसान माइक्रोफाइनान्स वित्तीय संस्थाका अध्यक्षले हस्ताक्षर गरेका छन् । तीनवटै कम्पनी एकअर्काका गाभिएपछि कम्पनी राष्ट्रियस्तरको लघुवित्त हुनेछ ।

काभे्रपलान्चोक जिल्ला, बनेपामा रजिष्टर्ड कार्यालय रहेको मिर्मिरे लघुवित्त वित्तीय संस्था चुक्ता पुँजी १२ करोड ८७ लाख ८६ हजार ४ सय, कर्जा लगानी  २ अर्ब ४० करोड, निक्षेप  ६८ करोड, संस्थामा आबद्ध सदस्य ६० हजार, चालू आवको चैत्र मसान्तसम्म खुद नाफा ३ करोड ५९ लाख रहेको छ ।  

झापा जिल्ला बिर्तामोडमा रजिष्टर्ड कार्यालय रहेको. नागबेली लघुवित्त वित्तीय संस्थाको चुक्ता पुँजी १६ करोड ७६ लाख ७९ हजार ५००, कर्जा लगानी ८१ करोड ७५ लाख, निक्षेप ३० करोड, संस्थामा आवद्ध सदस्य २० हजार, खुद नाफा २ करोड १२ लाख रहेको छ । त्यस्तै कैलालीको लम्की चुहा नगरपालिकामा रजिष्टर्ड कार्यालय रहेको किसान माइक्रोफाइनान्स चुक्ता पुँजी ८ करोड ९७ लाख ९७ हजार ७९०, कर्जा लगानी  १ अर्ब ३९ करोड ८५ लाख, निक्षेप  ३४ करोड ४५ लाख, संस्थामा आवद्ध सदस्य संख्या ४८ हजार र खुद नाफा १ करोड ३२ लाख रहेको छ । 

एक आपसमा गाभ्ने र गाभिने उद्देश्यका साथ मिर्मिरे लघुवित्त वित्तीय संस्थाका सन्तोष फुयाँलको संयोजकत्वमा नागबेली वित्तीय संस्थाका सञ्जय कुमार श्रेष्ठ र किसान वित्तीय संस्थाका खिमाराज न्यौपानेसहितको तीन सदस्यीय मर्जर समिति गठन गरी सहमती पत्रमा हस्ताक्षर भएको छ । 

मर्जर प्रकृया सम्पन्न भएपश्चात एकीकृत संस्थाको चुक्ता पुँजी ३८ करोड ६२ लाख ६३ हजार ६९० हुनेछ भने एकीकृत संस्थाको अध्यक्ष टेकबहादुर बोहरा, प्रमुख कार्यकारी अधिकृत कुमार याक्सो तथा नायब प्रमुख कार्यकारी अधिकृत बिर्खबहादुर बोहरा हुनेछन् । मर्जरपछि वित्तीय संस्थाको नाम किसान लघुवित्त वित्तीय संस्था लिमिटेड रहनेछ भने वित्तीय संस्थाको लोगो र कर्पोरेट कलर मिर्मिरे लघुवित्त वित्तीय संस्थाको कायम गरिनेछ । त्यस्तै एकीकृत संस्थाको केन्द्रीय कार्यालय मिर्मिरे लघुवित्त वित्तीय संस्थाको हाल केन्द्रीय कार्यालय रहेको स्थान बनेपा–८, काभे्रपलान्चोकमा रहनेछ ।