२४ माघ /अर्थ र व्यापार - जनता बैंकले चालु आर्थिक वर्षको दोस्रो त्रैमासमा खुद नाफा र लाभांश क्षमता करिब दोब्बर बनाएको वित्तीय विवरण सार्वजनिक गरेको छ । यस्तै जगेडा कोषको आकार १६९ प्रतिशत, तथा निक्षेप र कर्जा करिब ३० प्रतिशत हाराहारीमा बढाएको बैंकको खराब कर्जा अनुपात समेत घटेको छ ।

जनता बैंकले चालू आर्थिक वर्षको पुस मसान्तसम्ममा ६३ करोड ४६ लाख रुपैयाँ खुद नाफा कमाएको छ । गत वर्ष यसै अवधिको तुलनामा बैंकको खुद नाफा ९०.२६ प्रतिशत अर्थात ३० करोड ११ लाखले बढोत्तरी भएको हो । गत वर्षको दोस्रो त्रैमासमा बैंकको खुद नाफा ३३ करोड ३५ लाख रुपैयाँमा सीमित थियो ।

बैंकले बिहीबार सार्वजनिक गरेको नेपाल फाइनान्सिङ्ग रिर्पोटिङ्ग स्ट्याण्डर्ड (एनएफआरएस) अनुसार लाभांश क्षमता (फ्रि प्रोफिट) मा गत आवको पुसको तुलनामा २५ करोड ८६ लाख रुपैयाँ बढेर ५३ करोड ४ लाख कायम भएको छ । गत वर्ष यसै अवधि बैंकको फ्रि प्रोफिट २७ करोड १७ लाख रुपैयाँ थियो ।

समीक्षा अवधिमा बैंकको फ्रि प्रोफिट ९५.१९ प्रतिशतले बढेको छ । यद्यपी बैंकले आर्जन गरेको ६३ करोड ४६ लाख खुद नाफाबाट राष्ट्र  बैंकको व्यवस्था अनुरुप रेगुलेटरी एड्जस्टमेन्टबाट बैंकले १० करोड ४२ लाख रुपैयाँ व्यवस्था गर्दा बैंकको खुद नाफाभन्दा लाभांश क्षमता घटेको छ । गत आवको नाफाबाट नगद लाभांश मात्र वितरण गरेको बैंकको प्रतिशेयर आम्दानीमा ७ रुपैयाँ ५३ पैसाले सुधार आएको छ । गत पुस मसान्तमा बैंकको प्रतिशेयर आम्दानी वार्षिक ८ रुपैयाँ ३४ पैसा रहेकोमा बढेर १५ रुपैयाँ ८७ पैसा कायम भएको हो । बैंकको चुक्ता पूँजी ८ अर्बमा स्थिर रहेको छ ।बैंकको प्रतिशेयर नेटवर्थ १३७ रुपैयाँ ९८ पैसा छ भने मूल्य आम्दानी अनुपात १०.६५ गुणा बढी छ ।

समीक्षा अवधिमा बैंकको जगेडा कोष आकर्षक वृद्धि भएको छ । यस अवधिमा बैंकको जगेडा कोष १६९.२१ प्रतिशतले बढोत्तरी भएर तीन अर्ब तीन करोड ८६ लाख रुपैयाँ पुगेको छ । गत वर्षको यसै अवधिमा एक अर्ब १२ करोड ८७ लाख रुपैयाँ थियो । चालु आर्थिक बर्षको दोस्रो त्रैमासिक अवधिसम्ममा बैंकले ६८ अर्ब ४३ करोड ८४ लाख रुपैयाँ निक्षेप संकलन गरेको छ भने ६३ अर्ब ६५ करोड १० लाख रुपैयाँ कर्जा परिचालन गरेको छ । बैंकले गत आवको पुस मसान्तको तुलनामा निक्षेप संकलन २९.६१ प्रतिशत अर्थात १५ अर्ब ६३ करोड र कर्जा परिचालन ३१.८७ प्रतिशत अर्थात १५ अर्ब ३८ करोड रुपैयाँले बढेको हो । गत आवको पुससम्म बैंकले ५२ अर्ब ८० करोड १३ लाख रुपैयाँ निक्षेप संकलन गरि ४८ अर्ब २६ करोड ६५ लाख रुपैयाँ कर्जा परिचालन गरेको थियो ।

चालू आवको ६ महिना अवधिमा जनता बैंकले एक अर्ब ५८ करोड २१ लाख रुपैयाँ खुद ब्याज आम्दानी गरेको छ । बैंकले ४ अर्ब ५ करोड ५१ लाख ब्याज आम्दानी गरि २ अर्ब ४७ करोड २९ लाख रुपैयाँ ब्याज खर्च गरको हो । बैंकको खुद ब्याज आम्दानी गत वर्षको यसै अवधिको तुलनामा ४७.८६ प्रतिशत अर्थात ५१ करोड २१ लाख रुपैयाँ धेरै हो । गत आवको दोस्रो त्रैमासमा बैंकले एक अर्ब ७ करोड रुपैयाँ खुद ब्याज आम्दानी गरेको थियो ।