असोजमा पनि घट्यो बैंक ब्याजदर

119 पटक पढिएको

३१ भदौ/अर्थ र व्यापार – असोज महिनाका लागि पनि वाणिज्य बैंकहरूको ब्याजदर थप घटेको छ । २० वटा वाणिज्य बैंकले सार्वजनिक गरेको ब्याजदर सूचीअनुसार औसतमा भदौको तुलनामा असोज महिनाकालागि पनि बैंक ब्याजदर घटेको हो ।
भदौको तुलनामा असोज महिनामा वाणिज्य बैंकहरूको अधिकतम व्यक्तिगत मुद्दती निक्षेपको औसत ब्याजदर शून्य दशमलब ११३५ प्रतिशत विन्दुले घटेको छ । भदौ महिनामा व्यक्तिगत मुद्दतीको अधिकतम औसत ब्याजदर ५ दशमलब ५७७ प्रतिशत रहेको थियो ।
अब असोज महिनाको लागि बैंक ब्याजदर ५ दशमलब ४६३५ प्रतिशतमा कायम भएको छ । भदौको तुलनामा असोजमा १० वटा बैंकले व्यक्तिगत मुद्दती निक्षेपको अधिकतम ब्याजदर घटाएका छन् । व्यक्तिगत मुद्दतीको अधिकतम ब्याजदर ६ प्रतिशतमा कायम भएको छ ।
ब्याजदर घटाएका बैंकहरूमा कृषि विकास, एभरेस्ट, नेपाल, एनआईसी एसिया, प्राइम कमर्सियल, कुमारी, सानिमा, नेपाल एसबीआई, एनएमबी र सिटिजन्स इन्टरनेसलन बैंक लिमिटेड रहेका छन् ।
७ वटा बैंकले स्थिर राखेका छन् । स्थिर राखेका बैंकहरूमा माछापुच्छ्रे, प्रभु, राष्ट्रिय वाणिज्य, नबिल, ग्लोबल आईएमई, सिद्धार्थ र हिमालयन र इन्भेस्टमेन्ट मेगा रहेका छन् । लक्ष्मी सनराइज र स्ट्यान्डर्ड चार्टर्ड बैंकले भने ब्याजदर सामान्य बढाएका छन् ।
छोटो अवधिका लागि मुद्दती निक्षेपमा न्यून र लामो अवधिका लागि केही बढी ब्याजदर बैंकले दिँदै आएका छन् । व्यक्तिगत मुद्दतीमा बैंकहरुले तोकेको अधिकतम ब्याजदर लामो अवधिका लागि हो । व्यक्तिगत मुद्दती निक्षेपको ब्याजदर घट्दा बचत तथा कर्जाको ब्याज पनि स्वतः घट्न जान्छ ।
नेपाल राष्ट्र बैंकले चालु आर्थिक वर्षकालागि मौद्रिक नीतिमार्फत नीतिगत दरलाई घटाएर ब्याजदर घटाउन दवाव दिएपछि साउन र भदौमा पनि बैंकहरुले ब्याजदर घटाएका थिए । हाल नीतिगत दर ४ दशमलब ५ प्रतिशत छ । त्यस्तै स्थायी तरलता सुविधा दर ६ प्रतिशत र स्थायी निक्षेप सुविधा संकलन दर २.७५ प्रतिशत छ । कर्जा प्रवाहमा सुस्तता कायम रहँदा बैंकहरुको ब्याजदर घटिरहेको छ ।

तपाईको प्रतिक्रिया

सम्बन्धित शीर्षकहरु

सांग्रिला डेभलपमेन्ट बैंकद्वारा प्रहरी वृत्त दरबारमार्गलाई सहयोग