२७ पुस/अर्थ र व्यापार – नेपाल इन्भेष्टमेन्ट बैंक र मेगा बैंक नेपालको मर्जरपछि बुधबारदेखि एकीकृत कारोबार सुरु भएको छ । दुई बैंक मर्ज भएर नेपाल ‘इन्भेष्टमेन्ट मेगा बैंक’को नामबाट एकीकृत कारोबार सुरु भएको हो ।
१००ः९० को सेयर आदानप्रदान अनुपात (स्वाप रेसियो) मा नेपाल इन्भेष्टमेन्ट बैंक र मेगाल बैंक मर्ज भएका हुन् । मेगा बैंकको १०० कित्ता सेयर हुने सेयरधनीको मर्जपछि बनेको बैंकको ९० कित्ता सेयर हुनेछ भने नेपाल इन्भेष्टमेन्ट बैंकको मर्जरपछि बन्ने बैंकमा पनि १०० कित्ता नै सेयर हुनेछ ।
मर्जरपछि बैंकको सञ्चालक समिति अध्यक्षमा इन्भेष्टमेन्ट बैंकका पृथ्वीबहादुर पाँडे र प्रमुख कार्यकारी अधिकृतमा पनि नेपाल इन्भेष्टमेन्ट बैंकका ज्योतिप्रकाश पाण्डे छन् । कोर बैंकिङ सिस्टम पनि हाल नेपाल इन्भेष्टमेन्ट बैंकले प्रयोग गरेको छ ।
मर्जरपछि बैंकको कूल पूँजीकोष ५८ अर्ब र कूल सम्पत्ति ४ खर्ब ७१ अर्ब रुपैयाँ पुगेको छ । जसमा बैंकको चुक्ता पुँजी ३४ अर्ब ४३ करोड रुपैयाँ, कूल निक्षेप ३ खर्ब ६० अर्ब रुपैयाँ, कूल कर्जा ३ खर्ब २९ अर्ब रुपैयाँ नाघेको छ । मर्जरपछि यस बैंकको शाखा सञ्जाल २५७, एक्सटेन्सन काउन्टर ५९ र एटीएम संख्या २७५ पुगेको छ । यसैगरि, ग्राहक संख्या ३० लाख पुगेको सो बैंकको दाबी छ ।
दुईबैंक मर्जरभएसँगै यस बैंकको देसभर ३ सय ५६ शाखाबाट एकैपटक वित्तीय कारोबार सुरु भएको हो। जसमध्ये २ सय ९६ पूर्णकालिक शाखा हुन भने ५९ वटा एक्सटेन्सन काउन्टर छन् । यसैगरि, एनआईएमबीले १ सय ९ वटा शाखारहित बैंकिङ सेवा पनि दिइरहेको छ ।
७७ जिल्लामै शाखा पुगेको एनआईएमबीका २ सय ७९ वटा एटिएम काउन्टर छन् । नेपालको निजी क्षेत्रको पहिलो बैंकको रूपमा साढे ३ दशकअघि कारोबार सुरु गरेको इन्भेष्टमेन्ट र १२ वर्षअघि कारोबार सुरु गरेको मेगा एकीकृत भएर ‘नेपाल इन्भेष्टमेन्ट मेगा’ बैंकका रूपमा अघि आएको हो ।
३४ अर्ब १२ करोड रुपैयाँ कुल चुक्ता पुँजी रहेको बैंकको ५८ अर्बभन्दा बढी कुल पुँजी छ । पुँजीका हिसावले एनआईएमबी देशकै दोस्रो ठूलो बैंक हो । नेपाल इन्भेष्टमेन्ट बैंकका पृथ्वीबहादुर पाँडे र मेगा बैंक नेपालका अध्यक्ष भोजबहादुर शाहले संयुक्त रूपमा एकीकृत कारोबार सुरु गरेका हुन् ।
मर्जरपछि बनेको नयाँ बैंकको अध्यक्षमा साविक नेपाल इन्भेष्टमेन्ट बैंककै अध्यक्ष पृथ्वीबहादुर पाँडे र प्रमुख कार्यकारी अधिकृतमा ज्योतिप्रकाश पाण्डे छन् ।
नयाँ सञ्चालक समितिमा दुवै बैंकको सञ्चालकहरुको प्रतिनिधित्व रहने गरी नेपाल इन्भेष्टमेन्ट बैंकको तर्फबाट प्रजन्य राजभण्डारी, कवि कुमार टिब्रेवाला र मेगा बैंकको तर्फबाट गोपाल खनाल, मदनकुमार आचार्य र मुक्तिराम पाण्डे छन् ।
त्यसैगरी, साविक नेपाल इन्भेष्टमेन्ट बैंकमा स्वतन्त्र सञ्चालकको रूपमा रहेकी मञ्जु बस्नेत नै अब बन्ने सञ्चालक समितिमा पनि स्वतन्त्र सञ्चालक हुन् । मेगा बैंकका अध्यक्ष भोजबहादुर शाहले यो मर्जर देशको बैंकिङ क्षेत्र र अर्थतन्त्रका लागि सुखद र सकारात्मक कदम भएको बताए । उनले मर्जरपछि दुवैको नाम र काम अनुसारको गरिमालाई उच्च कायम राख्न दुवै बैंकमा रहेका असल परम्परा, संस्कार, ग्राहकहरुको सेवा, कर्मचारी व्यवस्थापन जस्ता सकारात्मक पक्षहरुलाई अंगिकार गर्नुका साथै सेयरधनीहरुको प्रतिफलमा न्यायोचित वृद्धि र निरन्तरता दिँदै जाने विश्वास व्यक्त गरे ।
एकिकृत कारोबार शुभारम्भको कार्यक्रममा दुबै बैंकका अध्यक्षहरु पाण्डे र शाहले यस रूपान्तरणकारी प्रयासमा हौसला दिने तथा साथ एवं सहयोग पु¥याउने नेपाल सरकार, नेपाल राष्ट्र बैंक, दुवै बैंकका सञ्चालक समिति, मर्जर समिति, कर्मचारी लगायत सम्बन्धित सम्पूर्ण क्षेत्र तथा शुभेच्छुकहरुप्रति संयुक्त रूपमा आभार व्यक्त गरेका थिए ।