७ माघ/अर्थ र व्यापार– चालु आर्थिक वर्षको दोस्रो त्रैमास अन्त्यसम्म वाणिज्य बैंकहरूले करिब १२ प्रतिशतले नाफा बढाएका छन् । नेपाल राष्ट्र बैंकबाट क वर्गको इजाजत प्राप्त वित्तीय संस्थाले यस अवधिमा व्यवसाय विस्ता गर्दै नाफा बढोत्तरी गरेका हुन् ।
शुक्रबार प्रकाशित २३ वाणिज्य बैंकको चालु आर्थिक वर्षको दोस्रो त्रैमाससम्मको अपरिस्कृत वित्तीय विवरणले यस्तो देखाएको हो ।
सो अवधीमा २३ बैंकले कुल २९ अर्ब ५९ करोड ३४ लाख ७४ हजार रूपैयाँ खुद नाफा गरेका हुन् । जुन गत आवको पुस मसान्तसम्म उनीहरूले गरेको खुद नाफा २६ अर्ब ५० करोड ६२ लाख ५६ हजार रूपैयाँभन्दा ११.६५ प्रतिशत बढी हो ।
चालु आवको दोस्रो त्रैमासमा ग्लोबल आईएमई बैंक नाफमा पनि नम्बर वान बैंकको रुपमा देखिएको छ । ग्लोबल आईएमई बैंकले चालु आवको दोस्रो त्रैमासिकमा १५ प्रतिशतले आफ्नो नाफा बढाएको छ । गत आर्थिक वर्षको सोही त्रैमासमा कुल
२ अर्ब ३१ करोड रुपैयाँ नाफा गरेको ग्लोबल आईएमई बैंककले चालु आवको दोस्रो त्रैमासिक गत पुस मसान्तसम्ममा २ अर्ब ६६ करोड रुपैयाँ नाफा गरेको छ । यो सबै बैंकहरुको भन्दा बढी नाफा हो । 
सो वित्तीय विवरण अनुसार ग्लोबल आईएमई, एनआईसी एशिया र नबिल बैंकले ६ महिनामै २ अर्ब रुपैयाँ खुद नाफा गरेका छन् । यी मध्ये एनआईसी एशियाले मंसिर मसान्तमै २ अर्ब नाफा गरेको थियो । पुस मसान्तसम्म ग्लोबलले सबैभन्दा बढी २ अर्ब ६६ करोड, एनआईसीले २ अर्ब ४० करोड र नबिलले २ अर्ब १७ करोड रूपैयाँ नाफा गरेको हो ।
यसैगरि, थप ११ बैंकले १ अर्ब रूपैयाँ भन्दा बढी नाफा गरेका छन् । पुस मसान्तसम्म राष्ट्रिय वाणिज्य बैंकको खुद नाफा १ अर्ब ९१ करोड रुपैयाँ छ भने बढी नाफा कमाउने पाँचौं बैंक प्राइम कमर्सियल बैंक हो । सो बैंकको नाफा १ अर्ब ६७ करोड रुपैयाँ छ ।
समिक्षा अवधीमा नाफा बढाउने दर सबैभन्दा बढी सिभिल बैंकको छ । सो बैंकले गत वर्षको पुसको भन्दा १ सय ४८ प्रतिशतले नाफा बढाएको हो । त्यसैगरि, सिद्धार्थ बैंककको नाफा ७१ प्रतिशतले बढेको छ । 
यसैगरि, नाफामा एनआईसी एसिया बैंक दोस्रो बनेको छ । गत आवको सोही अवधिमा २ अर्ब ६ करोड रुपैयाँ नाफा गरेको एनआईसी एसिया बैंकले चालु आवको दोस्रो त्रैमासिकमा २ अर्ब ४० करोड रुपैयाँ नाफा गरेको छ । 
एनआईसी एसिया बैंकको नाफा गत आवको तुलनामा १६.४७ प्रतिशतले बढेको छ । नबिल बैंक नाफामा तेस्रो बनेको छ । यसअघि नाफामा नम्बर वान बन्ने नबिल बैंक यो पटक भने तेस्रो बनेको छ । नबिलले गत आर्थिक वर्षको सोही अवधिमा २ अर्ब १ करोड रुपैयाँ नाफा गरेकोमा चालु आवमा २ अर्ब १८ करोड रुपैयाँ नाफा गरेको छ । जुन गत आवको सोही त्रैमासिकको तुलनामा ८.२० प्रतिशत बढी हो ।
अहिले गत आवको सोही अवधिको तुलनामा सिभिल बैंकले सबैभन्दा बढी नाफा गरेको छ । सिभिल बैंकले नाफा १४८ प्रतिशतले बढाएको छ । गत आवको सोही अवधिमा २० करोड रुपैयाँ नाफा गरेको सिभिल बैंकले चालु आवको दोस्रो त्रैमासिकमा कुल ५० करोड रुपैयाँ नाफा गरेको छ ।
यसैगरि, ५ वटा वाणिज्य बैंकको नाफा भने घटेको छ । गत आर्थिक वर्षको तुलनामा चालु आवको सोही अवधिमा पाँच वटा वाणिज्य बैंकको नाफा घटेको हो ।
नाफा घट्नेमा प्रभु बैंक, प्राइम कमर्सियल बैंक, कुमारी बैंक , एभरेष्ट बैंक र नेपाल बंगलादेश बैंक रहेका छन् । ती बैंकहरुको नाफा क्रमशः १६.९० प्रतिशत, ७.४३ प्रतिशत, २१.७६ प्रतिशत, १२.७८ प्रतिशत र १३.८२ प्रतिशतले घटेको हो ।