२४ कात्तिक/ अर्थ र व्यापार – पछिल्लो दुई दिनमा मात्रै नेप्से ६२.६७ अंकले घटेको छ । बुधबार ३९.१५ अंकले घटेको बजार बिहीबार थप २३.५२ अंकले घटेको हो ।
यसअघि सोमबार ६.४३ अंक र मंगलबार २.५७ अंकले बजार घटेको थियो । आइतबार भने नेप्से ४३ अंकले बढेको थियो ।
बिहीबार नेप्से १.२३ प्रतिशत अर्थात २३.५२ अंकले घटेर १८९३.७० बिन्दुमा झरेको छ । ठूला कम्पनीको कारोबार मापक सूचक सेन्सेटिभ इन्डेक्स ४.१७ अंकले घटेर ३७२.३७ बिन्दुमा झरेको छ ।
बुधबार कारोबारमा आएका कूल १३ उपसमूहगत सूचकमध्ये सबै ऋणात्मक बनेका छन् । फाइनान्स सर्वाधिक २.३४ प्रतिशतले घटेको बजारमा अन्य २.३४ प्रतिशत र जलविद्युत २.०७ प्रतिशतले घटेको छ ।
ब्यापार, होटल, विकास बैंक, निर्जीवन बीमा, उत्पादन तथा प्रशोधनमुलक, लघुवित्त, लगानी र म्युचुअल फन्ड पनि १ प्रतिशत धेरैले घट्यो ।
बजार उच्च अंकले ऋणात्मक हुने क्रम जारी रहँदा कारोबार रकम पनि अघिल्लो दिनको तुलनामा २९ करोडले घटेर बुधबार १ अर्ब ११ करोड ९४ लाख ६१ हजार ४११ रूपैयाँ बराबरको सेयर खरिद बिक्री भएको छ । बुधबार १ अर्ब ४० करोड ७४ लाख रुपैयाँको कारोबार भएको थियो ।
यसदिन २२६ कम्पनीको ३१ लाख १४ हजार ६८९ कित्ता सेयर खरिद २२ हजार ३९८ वटा संख्यामा खरिद बिक्री भएको छ । बुधबार २२३ कम्पनीको ३६ लाख ९७ हजार ७२३ कित्ता सेयर खरिद २४ हजार ३८८ वटा संख्यामा खरिद बिक्री भएको थियो ।
आज कारोबार रकमका आधारमा शिवम् सिमेन्टस् अग्र स्थानमा रहेको छ । सर्वाधिक कारोबार भएको सो कम्पनीको १० करोड २२ लाख ३५ हजार रुपैयाँ बराबरको १ लाख ६२ हजार ११५ कित्ता सेयर खरिद बिक्री भएको छ ।
यस्तै नेपाल पुनर्बीमा कम्पनीको ३ करोड ५८ लाख रुपैयाँ, युनाइटेड मोदी हाइड्रोपावर ३ करोड ३४ लाख, हिमालयन डिष्टिलरी ३ करोड ३३ लाख र रिडी पावरको ३ करोड ३० लाख रुपैयाँ बराबरको सेयर कारोबार भएको छ । गोर्खाज फाइनान्स, नबिल बैंक, एनआईसी एशिया बैंक, नेष्डो समृद्ध लघुवित्त, र शाइन रेसुङ्गा डेभलपमेन्ट बैंक शीर्ष कारोबार हुने दश कम्पनीभित्र समेटिएका छन् ।

बिहीबारको बजारमा मन्दाकिनी हाइड्रोपावर कम्पनी लिमिटेडको सेयरमूल्य सबैभन्दा धेरै बढेको छ । कम्पनीको सेयरमूल्य ३.९२ प्रतिशतले बढेर ३३१.५० रूपैयाँ पुगेको छ । यस्तै सिन्धु विकास बैंक २.७७, हिमालयन पावर पार्टनर १.७८, सिटिजन्स म्युचुअल फण्ड–२ को इकाईमूल्य १.३९ र उपकार लघुवित्तको सेयरमूल्य १.२० प्रतिशतले बढेको छ ।
आजको बजारमा अपर हेवाखोलाका लगानीकर्ताहरूले सबैभन्दा धेरै गुमाएका छन् । कम्पनीको सेयरमूल्य ६.९१ प्रतिशतले घटेर ३६४ रूपैयाँमा झरेको छ । यस्तै किसान लघुवित्तको ५.७८, पन्चकन्या माई हाइड्रोपावर ५.२५ प्रतिशत, इमर्जिङ्ग नेपाल लिमिटेड ५.२० प्रतिशत, गुहेश्वरी मर्चेन्ट बैंकिङ्ग ५.२० प्रतिशत र एनआरएन इन्फ्रास्ट्रक्चर लिमिटेडको सेयरमूल्य ५.०३ प्रतिशतले घटेको छ । पाँचथर पावर, रिभर फल्स पावर, मिर्मिरे लघुवित्त र नेपाल पुनर्बीमा कम्पनीको सेयरमूल्य साढे ४ प्रतिशत हाराहारीमा घटेको छ ।