३० पुस/अर्थ र व्यापार - चालु आर्थिक बर्षको दोस्रो त्रैमासको आज अन्तिम दिन करदाता र कर उठाउने सरकार दुवै दबाबमा छन् । करदातालाई कर आज बेलुकीसम्म बुझाइसक्नुपर्ने दबाब छ भने सरकार आफूले तोकेको लक्ष्य पुरा गर्न लागिपरेको छ । 
यतिबेला सबै कर कार्यालय र भन्सारका प्रमुखहरु पुसका लागि तोकिएको लक्ष्य पुरा गर्ने दौडमा छन् । पुस मसान्तसम्मको तथ्यांकले समग्र बजेट कार्यान्वयन र राजस्व संकलनको तस्बिर देखाउने भएकाले पनि आफ्नो ’पर्फर्मेन्स इन्डेक्स’ बलियो देखाउन सबैको दौडधुप चलिरहेको छ । 

सुस्त व्यवसायिक गतिविधि र कमजोर विकास खर्चको असर सरकारको राजस्व संकलनमा देखिएको छ । चालु आर्थिक वर्षको पुस मसान्तसमम्मा ४ खर्ब २९ अर्ब रुपैयाँ र पुस महिनामा मात्रै १ खर्ब १२ अर्ब रुपैयाँ राजस्व संकलनको लक्ष्य राखिएकोमा त्यो पुरा नहुने देखिएको छ ।  आइतबार बेलुकीसम्मको राजस्व संकलनको अवस्था हेर्दा पुस मसान्तको राजस्व संकलन ४ खर्ब १० अर्ब रुपैयाँको हाराहारीमा हुने देखिएको छ । आइतबार बेलुकीसम्ममा देशका अधिकांश कर कार्यालय र भन्सार कार्यालयको राजस्व संकलन लक्ष्यको तुलनामा ७० प्रतिशत मात्रै भएको छ ।

सबैभन्दा धेरै राजस्व संकलनको लक्ष्य पाएको ठूला करदाता कार्यालयले यो महिना लक्ष्यभन्दा करिब १० अर्ब रुपैयाँ थोरै संकलन हुने अनुमान गरेको छ । कार्यालयलाई पुसमा ४६ अर्ब ९९ करोड रुपैयाँ राजस्व संकलनको लक्ष्य दिइएकोमा ३८ अर्ब रुपैयाँ मात्रै संकलन हुने उसले अनुमान गरेको छ ।  मध्यमस्तरीय करदाता कार्यालयको अवस्था पनि उस्तै छ । कार्यालयले आइतबार बेलुकीसम्ममा करिब साढे दुई अर्ब रुपैयाँ राजस्व संकलन गरेको छ । सोमबार थप डेढ अर्ब संकलन भए मात्रै उसको ४ अर्ब रुपैयाँको लक्ष्य पुग्छ । ’हामीले पाएको लक्ष्यअनुसार संकलन हुँदैन,’ कार्यालयका एक कर अधिकृतले भने। 

भन्सार कार्यालयहरु पनि राजस्व संकलनको लक्ष्य पुरा नहुने अवस्थामा पुगेका छन । सबैभन्दा धेरै राजस्व संकलन गर्ने वीरगञ्ज भन्सार कार्यालयले पुसमा लक्ष्यको तुलनामा ८५ प्रतिशत मात्रै राजस्व संकलन हुने जनाएको छ ।  यसैगरी भैरहवा भन्सार कार्यालयले पुसमा ७ अर्ब ५३ करोड रुपैयाँ राजस्व संकलनको लक्ष्य पाएकोमा त्यसको करिब ७३ प्रतिशत मात्रै संकलन भएको छ । भैरहवाले सोमबारसम्ममा ८० प्रतिशत संकलन र्पुयाउने कसरत गरिरहेको छ। यद्यपि यसका लागि पनि ६० करोड रुपैयाँ आवश्यक पर्छ ।

पुसमा सबैभन्दा राम्रो राजस्व संकलन रसुवागढी भन्सार कार्यालयको छ । भन्सार प्रमुख पुण्यविक्रम खड्काले आइतबारसम्ममा लक्ष्यको तुलनामा १४० प्रतिशत संकलन भएको जानकारी दिए । रसुवाबाट पुस मसान्तसम्ममा ५ अर्ब ५९ करोड २१ लाख १४ हजार रुपैयाँ राजस्व संकलन गरेको छ। जुन वार्षिक लक्ष्यको ७९ प्रतिशत हो। आन्तरिक राजस्व र भन्सारअन्तर्गतका प्रमुख कार्यालयहरुको आइतबारसम्मको संकलनको अवस्था हेर्दा सोमबार एकैदिन सरकारले करिब ४५ अर्ब रुपैयाँ राजस्व संकलन गर्नुपर्ने देखिन्छ । तर ती कार्यालयले नै राजस्व संकलनको लक्ष्य पुरा नहुने बताइसकेका छन् । राजश्व नपुग्ने भएपछि अर्थमन्त्रालयले दूरसञ्चार प्राधिकरणको कोषमा रहेको ३ अर्ब रुपैयाँ राजश्व खातामा जम्मा गर्न निर्देशन दिएको छ ।